Yangiliklar
Toshkent viloyatida qiymati 900 mln dollarlik uchta logistika markazi qurilmoqda — hokim
Toshkent viloyatida umumiy qiymati 900 mln dollar bo‘lgan uchta logistika markazi loyihasi amalga oshirilmoqda, dedi viloyat hokimi Zoyir Mirzayev prezident Shavkat Mirziyoyevga taqdimotdan so‘ng “O‘zbekiston 24” telekanaliga bergan intervyusida.
Uning so‘zlariga ko‘ra, birinchi obyekt Angren va Ohangaron hududida qurilmoqda hamda yirik taqsimlash markaziga aylanishi kerak.
“Bu xalqaro standartlarga mos logistika xabidir. Bu yerda 100 mln dollar miqdorida investitsiya ko‘zda tutilgan, tadbirkor allaqachon aniqlangan. Xitoy — Qirg‘iziston — O‘zbekiston temir yo‘li ishga tushirilmoqda. Ushbu temir yo‘l ishga tushguniga qadar logistika xabi faoliyat boshlashi kerak. Hozir bu biz uchun eng qulay imkoniyat”, — dedi hokim.
Ikkinchi logistika markazi Yangiyo‘l tumanida rejalashtirilgan. U Qozog‘istonlik tadbirkorlar bilan hamkorlikda qariyb 150 gektar maydonda qurilmoqda.
“Loyihaning qiymati 300 mln dollarni tashkil etadi. Bugungi kunga qadar 144 mln dollar mablag‘ kelib tushgan. Masala — loyihani oxiriga yetkazish va qurilishni jadallashtirishdan iborat”, — dedi Zoyir Mirzayev.
Uchinchi markaz Qibray tumanida, Qozog‘iston bilan chegarada, S. Najimov nomidagi chegara posti yaqinida quriladi. Loyiha uchun 20 gektar maydon tanlangan. “500 mln dollar miqdorida xorijiy investitsiyalar ko‘zda tutilmoqda”, — dedi viloyat rahbari.
Hokimning so‘zlariga ko‘ra, uchta logistika markazi kamida 7000 ta ish o‘rni yaratadi.
“Eng muhimi — biz shu paytgacha yetarlicha e’tibor qaratmagan bir jihatni ta’kidlash kerak. Uchta logistika markazi kamida 7000 ta ish o‘rni yaratadi. Hurmatli prezident ushbu markazlarda ishlaydigan odamlar uchun yashash, dam olish va xizmat ko‘rsatish sharoitlari yaratilishini topshirdi”, — dedi u.
Zoyir Mirzayev taqdimot yakunlari bo‘yicha prezident hujjati qabul qilinishini qo‘shimcha qildi.
“Uni juda qisqa muddatlarda qabul qilish zarur. Biz hokimlarga ushbu jarayonni tezlashtirish va ishlarni tashkil etishda asosiy tashabbuskor bo‘lish topshirildi”, — dedi Toshkent viloyati hokimi.
Avvalroq prezident huzuridagi taqdimotda Toshkent viloyatining Angren shahri, shuningdek Yangiyo‘l va Ohangaron tumanlarini tranzit va tashqi savdo yuklari uchun oraliq taqsimlash markazlari sifatida rivojlantirish rejalashtirilayotgani qayd etilgan edi.
Transport-logistika tizimini rivojlantirish bo‘yicha takliflar doirasida, shuningdek, Ohangaron tumanida “A” toifasidagi yirik logistika markazini qurish, Yangiyo‘l tumanidagi temir yo‘l stansiyasini kengaytirish, bojxona terminallari va avtoturargohlar tashkil etish, sohani raqamlashtirish hamda chegarada “bir bekat” tamoyilini joriy etish masalalari ham ko‘rib chiqildi.
Manba
